සංක්ෂිප්ත සිංහල ශබ්දකෝෂය – 22
අග්‍ර දර්ශනය
නා. උත්තම දෘෂ්ටිය; ශ්‍රේෂ්ඨ දර්ශනය.
අග්‍ර දානය
1. නා. බුද්ධත්වයට පැමිණීමෙන් පසු බුදුවරයකු ලබන පළමු දානය.
2. නා. අස්වැන්නේ පළමු කොටසින් දෙන ප්‍රථම දානය; නොඉඳුල් දානය.
අග්‍ර දූතයා
1. නා. මුලින් ම දූත මෙහෙවරෙහි යෙදෙන්නා; ශ්‍රේෂ්ඨ දූතයා.
2. නා. (ක්‍රිස්ති.) උසස් ගණයට අයත් වන දේව දූතයා.
අග්‍ර දේවී
නා. රජකුගේ අගමෙහෙසිය; අභිෂේක ලද බිසව.
අග්‍ර ප්‍රාප්තයා
නා. අගතැන්පත් තැනැත්තා; ප්‍රධාන තැනට පත් තැනැත්තා.
අග්‍ර පුරෝහිතයා
නා. (රජ කෙනෙකුගේ) ප්‍රධාන පුරෝහිතයා; ප්‍රධාන උපදේශකයා; අග පෙරෙවියා.
අග්‍ර ඵලය
1. නා. අ. යම් කාර්යයකින් ලැබෙන උපරිම තත්ත්වය; යම් දෙයක ඉහළ ම ප්‍රතිලාභය.
2. නා.උතුම් වූ ඵලය; මාර්ගඵල අතුරෙන් ශ්‍රේෂ්ඨ වූ ඵලය; අර්හත් ඵලය.
අග්‍ර බාහුව
නා. අතේ වැළමිට සිට මැණික් කටුව දක්වා ඇති කොටස; අත් දණ්ඩෙහි පහළ කොටස.
අග්‍ර භාගය
1. නා. අග කොටස; අවසන් කොටස.
2. නා. මුල් කොටස; ප්‍රධාන කොටස.
අග්‍ර භෝජනය
1. නා. පළමුවෙන් පිළියෙල කළ බොජුන්; නොඉඳුල් ආහාරය.
2. නා. අලුත් අස්වැන්නෙන් මුලින් ම පිරිනමන දානය.
අග්‍ර මාණික්‍යය
නා. උතුම් මැණික; අගමිණ.
අග්‍ර මාර්ගය
1. නා. ශ්‍රේෂ්ඨ මාර්ගය; රහත්මඟ.
2. නා. ආර්ය අෂ්ටාංගික මාර්ගය.
අග්‍ර මාර්ගාධිගමය
නා. අර්හත් මාර්ගයට පැමිණීම; රහත් වීම.
අග්‍ර රන්ධ්‍රය
නා. ඇත් සොඬ අග; ඇත් සොඬෙහි කෙළවර.
අග්‍ර රසය
නා. මිහිරි රසය; ප්‍රණීත බව.
අග්‍ර රාජධානිය
නා. අගනුවර; ප්‍රධාන නගරය.
අග්‍ර රාජ්‍යය
නා. මහා රාජ්‍යය; අධිරාජ්‍යය; ප්‍රධාන රාජ්‍යය.
අග්‍ර විනිශ්චයකාරයා
නා. අධිකරණයෙහි නායක; විනිශ්චයකාරයා; ශ්‍රේෂ්ඨාධිකරණයේ නායකයා.
අග්‍ර ශස්‍යය
නා. මුල් අස්වැන්න; ගොවිතැනින් ලබාගන්නා පළමු පලදාව; අගසස්.
අග්‍ර ශ්‍රාවකයා
නා. බුදුවරයෙකුගේ අගසවු තනතුර දරන්නා; බුදුවරයෙකුගේ ප්‍රධාන ශ්‍රාවකයා; අගසව්වා.
අග්‍ර ශ්‍රාවිකාව
නා. බුද්ධ ශ්‍රාවිකාවන් අතර ප්‍රධාන තැනැත්තිය; ජ්‍යෙෂ්ඨ ශ්‍රාවිකාව.
අග්‍ර ස්ථානය
නා. මුල්තැන; ප්‍රධාන තැන; නායක ධුරය.
අග්‍ර ස්ථානාන්තරය
නා. උතුම් පදවිය; ශ්‍රේෂ්ඨ ධුරය; අග තනතුර.
අග්‍ර සූත්‍රිකාව
(පාරිභා.) නා. ඇතැම් පෘෂ්ඨවංශීන්ගේ සුෂුම්නාවේ පශ්චාත් කෙළවර දික්වීමෙන් සෑදෙන සිහින් ස්නායු කෙන්ද (=filum terminale).