සංක්ෂිප්ත සිංහල ශබ්දකෝෂය – 1381

ලකුණ

1. නා. යමක් හැඳින ගැනීමට උපකාර වන කරුණ ; සලකුණ ; ලක්ෂණය.
2. ලෝක ස්වභාවය ; අනිත්‍ය, දුක්ඛ, අනාත්ම යන ත්‍රිවිධ ලක්ෂණ.
3. සටහන ; චිහ්නය ; කැලල ; ලපය.
4. අක්ෂර නියමය ; ගුරු, ලඝු නියමය ; අලංකාරයන්හි ලක්ෂණ.
5. (විභාග උත්තර පත්‍ර බැලීමේ දී පිළිතුරුවලට දෙනු ලබන) ඇගයීම් සංඛ්‍යාව.
6. පිළිමය ; ප්‍රතිමාව.

ලකුණ්ටක

වි. උස නැති ; මිටි ; වාමන.
නා.ප්‍ර. මිටි තැනැත්තා ; මිට්ටා.

ලකුණු කරනවා

1. ක්‍රි. සලකුණු කරනවා ; සටහන් කරනවා.
2. විභාග උත්තර පත්‍ර බැලීමේ දී එහි අගය අනුව ඒවා සුදුසු සංඛ්‍යාව දමනවා.

ලකුණු කළ මිල

(පාරිභා.) නා. යම්කිසි භාණ්ඩයක සටහන් කර ඇති වටිනාකම ; නියම කළ මිල.

ලකුලු

වි. අලංකාර ; ශෝභමාන ; මනහර ; ලකල්.

ලකෝලිය

නා. කමත අතුගාන ඉදල ; බෝලත්ත ; පඹ අත්ත.

ලග

වි. ඇලුණු ; බැඳුණු ; ආසන්න.

ලගඩුව

නා. පොල්ල ; මුගුර.

ලගණය

නා. ඇස් පිහාටුවේ හට ගැනෙන කුඩා ගැට විශේෂයක් ; නගනය.

ලගනවා

1. ක්‍රි. ඇලෙනවා ; ආසක්ත වෙනවා.
2. රාත්‍රිය ගත කරනවා.
3. වැතිරෙනවා ; වැටී සිටිනවා.
4. තාවකාලික ව රැඳී සිටිනවා.

ලගමන

නා. මරා ගත් ඌරකුගේ වලිගය හා තට්ටම් පෙදෙසට අයත් මස් වැදැල්ල.

ලග්ගහනවා

ක්‍රි. කියාගත නොහැකි වෙනවා ; යමක් ප්‍රකාශ කරන විට දිව පටලැවීමෙන් අදහස් පැවසීමට අසීරු වෙනවා.

ලග්න

වි. ඇලුණු ; ආසක්ත ; සංසක්ත ; පටලැවුණු ; රැඳුණු; නිරත වුණු.
1. නා.ප්‍ර. (ජ්‍යෝති.) සූර්ය මාර්ගය දොළහට බෙදීමෙන් ලැබෙන කොටස ; කෙනෙකුගේ උත්පත්ති මොහොතේ ක්ෂිතිජයෙන් උදාව පැවති අංශක 30කින් යුත් කොටස.
2. ඇලීම ; ආසක්ත වීම.
3. ලැගීම ; නැවතීම ; විසීම.
4. ප්‍රධාන ශාකයකට හා කරන කොටස ; ශාකයකට බද්ධ කරන කොටස ; බද්ධය.

ලග්න ඒරාෂ්ටකය

නා. (ජ්‍යෝති.) ත්‍රිවිධ ඒරාෂ්ටක අතුරෙන් එකක්; සෙනසුරු ග්‍රහයා ලග්න කේන්ද්‍රයේ 1, 2, 12 යන ස්ථානවල ගමන් කිරීම නිසා ඇතිවන යෝගය ; මෙය අගුණ කාලයකැයි සාමාන්‍යයෙන් සැලකේ.