සංක්ෂිප්ත සිංහල ශබ්දකෝෂය – 556
ගඳකසට
නා. සුවඳ කරන ලද සායම්; සුවඳ පොවන ලද පඬු.
ගඳකිළි වැණිය
නා. ගඳකිළියේ පලය මුදුනේ ඇති කොත.
ගඳකිළිය
1. නා. සුවඳවත් කාමරය; විහාරස්ථානයක බුදුරදුන්ගේ වාසය සඳහා වෙන් කරනු ලැබූ කාමරය; බුදුරදුන් නිවැසි කුටිය; ගන්ධකුටිය.
2. නා. මහනුවර දළදා මැදුරෙහි දළදා හිමියන් වඩා හිඳුවනු ලැබ ඇති විශේෂ කුටිය.
ගඳතෙල
නා. පහන් දැල්වීම සඳහා ගනු ලබන සුවඳ කැවූ තෙල්; සුගන්ධ තෛලය.
ගඳදිය
නා.ප්‍ර. සුවඳ ද්‍රව්‍ය මිශ්‍ර කරන ලද වතුර; සුවඳ පැන්.
ගඳදුම්
නා.ප්‍ර. සුවඳ වර්ග දැවීම නිසා නඟින දුම; සුවඳ කුඩු ගින්නට බහා ලීමෙන් ඇති කරනු ලබන ධූමය; සුවඳ දුම.
ගඳපණ
නා. සුවඳ ද්‍රව්‍ය විකුණන වෙළෙඳ හල.
ගඳමල්
නා.ප්‍ර. සුවඳ ද්‍රව්‍ය හා මල්මාලා; සුවඳ මල්.
ගඳඹපුර
නා.ප්‍ර. (ජ්‍යෝති.) අහසේ පෙනෙන උල්කා දර්ශන විශේෂයක්.
ගඳයා
1. (කථා.) නා. පිළිකුල් කටයුතු ක්‍රියාවල නිරත තැනැත්තා; නීච ක්‍රියා කරන්නා; අධමයා.
2. (කථා.) නා. වළහා.
ගඳරොන්
නා.ප්‍ර. සුවඳ රේණු; සුවඳ සුණු.
ගඳවස
නා. සුවඳ වහනය වන ද්‍රව්‍ය; සුවඳ සුණු.
ගඳව්
1. නා.ප්‍ර. සංගීතය; සංගීත ශාස්ත්‍රය; ගාන්ධර්ව ශාස්ත්‍රය; ගාන්ධර්වය.
2. නා.ප්‍ර. සංගීතඥයා; ගාන්ධර්වයා; ගදඹා.
3. නා.ප්‍ර. දෙවියන්ගේ සංගීතඥයා; ගාන්ධර්ව යෝනියෙහි උපන් දෙවියා.
ගඳවිලවුන්
නා.ප්‍ර. ශරීරයෙහි ආලේප කරන හෝ අතුල්ලන සුවඳ ද්‍රව්‍ය; සුවඳ සුණු සහ සුගන්ධාලේප.
ගඳහැල්
නා.ප්‍ර. පිසූ විට සුවඳ හමන හැල් වී වර්ගයක්; සුවඳ හැල්; සුවඳැල්.
ගඳැතා
1. නා. දස ඇත්කුල අතුරින් ගන්ධ නම් කුලයට අයත් ඇතා; ගන්ධ හස්තියා.
2. නා. මද වෑහෙන ඇතා.
ගඳැව් දෙව්රජ
නා. ගාන්ධර්වයන්ට අධිපති දිව්‍යරාජයා; සතරවරම් දෙව්රජුන් අතරෙන් නැගෙනහිර දිශාව පාලනය කරන ධෘතරාෂ්ට්‍ර දෙව්රජ.
ගඳෙව් මඬල
නා. සංගීතඥයින්ගේ කණ්ඩායම; ගාන්ධර්ව මණ්ඩලය.
ගඳොළ
නා. බුදුරදුන් වැඩ විසූ ගඳකිළිය; ගන්ධකුටිය.
ගප්
නා.ප්‍ර. ගබ.
ගප් ගන්නවා
ක්‍රි. මවු කුසෙහි දරුවකු පිළිසිඳ ගන්නවා; දරු ගර්භයක් පිහිටනවා.
ගප්සාව
නා. දරු ගර්භය මුහුකුරා යන්නට පෙර මව් කුසින් බැහැරවීම; ගර්භස්‍රාවය; ගබ්සාව.
ගබ
1. නා. මවුකුස; මාතෘ කුක්ෂිය; ගර්භාසය.
2. නා. ඇතුළත; අභ්‍යන්තරය.
3. නා. කාමරය; කුටිය; ඕවරකය.
4. නා. ස්තුපයක බඳ; චෛත්‍ය ගර්භය.
5. නා. චක්‍රය; වගුව.
6. නා. නයාගේ පෙණ ගොබය.
ගබ පෙරහර
නා. දරු ගැබක් ඇති වූ පසු, ගර්භයත් මවත් සුරක්ෂිත වීම සඳහා අනුගමනය කරනු ලබන ශාන්තිකර්‍ම ආදි ක්‍රියාපටිපාටිය; ගැබිණි අවස්ථාවේ දී කළ යුතු උපචාර විධි.
ගබ හෙළනවා
ක්‍රි. දරු ගැබ මෝරා සම්පූර්ණ වීමට පෙර එය වැටෙන්නට සලස්වනවා; ගබ්සා කරනවා; ගර්භාපාතය කරවනවා.