සංක්ෂිප්ත සිංහල ශබ්දකෝෂය – 120
අනුවර්තිත
වි. අනු ව පැවතුණ; අනු ව ගිය.
අනුවර්තිනී
1. වි. අනු ව පවතින; අනුකූල ව පවතින.
2. (ව්‍යාක.) වි. අධිකාර වශයෙන් ප්‍රවර්තක.
අනුවර්තීවාදය
නා. මනසත්, ශරීරයත් අතර සම්බන්ධතාව තේරුම් කරන ධර්මය හෙවත් දෘෂ්ටිය.
අනුවහන
නා.ප්‍ර. අනු ව පැවැත්ම; අනුව යෑම.
අනුව්‍යඤ්ජනය
1. නා. මහා පුරුෂයකුගේ ශරීරයෙහි වන අනුලක්ෂණයක්; මහා පුරුෂ ලක්ෂණයන්ට දෙවනුව සිටි ලක්ෂණ ප්‍රකාශක වූ කුඩා ලකුණ.
2. නා. සවිස්තර ලක්ෂණය; ශරීර අවයව ආදින්ගේ ආකාර හෝ හැඩහුරුකම.
3. නා. පසු ව එන අක්ෂර සමූහය; එකිනෙක ව්‍යඤ්ජනාක්ෂර.
අනුවාක්‍යය
1. නා. අප්‍රධාන වාක්‍යය.
2. නා. වාක්‍ය ඛණ්ඩය; ලියවිල්ලක කොටසක්.
අනුවාතය
නා. සුළඟ හමන අත; සුළඟ හමා එන පැත්තට අභිමුඛ වූ පැත්ත; යටි සුළඟ.
අනුවාදකය
නා. අර්ථයක් පැහැදිලි කරන හෙවත් විස්තර කරන පදය; අර්ථසූචකය.
අනුවාදය
1. නා. නැවත කීම; පුනරුක්තිය.
2. නා. විස්තර කථනය; අර්ථය පැහැදිලි කිරීම.
3. නා. අන් බසකට පෙරළීම; පරිවර්තනය.
4. නා. අපවාදය; දෝෂාරෝපණය; චෝදනාව.
අනුවාද්‍ය
වි. පහදා දිය යුතු; විස්තර කළ යුතු.
අනුවාදිත
වි. අනුවාද කළ; විස්තර කරන ලද; පැහැදිලි කරන ලද.
අනුවාසනය
1. නා. (රෙදි) සුවඳ කැවීම; බෙහෙත් දුම් ගැස්වීම.
2. (වෛද්‍ය.) නා. බඩට තෙල් වස්ති කිරීම හෙවත් විදීම.
අනුවැති
වි. අනු ව පවතින; අනුකූල ව පවතින; අනුවර්තී.
අනුවිචරණ
නා.ප්‍ර. යම් අරමුණක නැවත නැවත සිත හැසිරවීම; භාවනා කිරීම.
අනුවිජ්ජකයා
නා. (විනය.) පරීක්ෂා කරන්නා; විචාරන්නා (අධිකරණ විනිශ්චය කරන භික්ෂුව සඳහා යෙදේ).
අනුවිතර්කණය
නා. නැවත නැවත විචාරීම හෙවත් කල්පනා කිරීම.
අනුවිද්ධ
වි. සලකුණු කරන ලද; අංකිත.
අනුවිධාන
නා.ප්‍ර. අනු ව පැවැත්ම; අනුකූලතාව.
අනුවින්දනය
නා. විඳ ගැනීම; අනුභවය.
අනුවිලෝකනය
නා. නැවත නැවත බැලීම හෝ සැලකීම; සමාලෝචකය.
අනුවිවෘත්ත
වි. නැවත විස්තර කරන ලද; වැඩිදුරටත් පැහැදිලි කරන ලද.
අනුවිසි
වි. වසඟ වූ; යටත් වූ.
නා.ප්‍ර. දහ නවය.
අනුවෘංහණය
නා. වැඩීම; වර්ධනය කිරීම; දියුණු කිරීම.
අනුවෘත්තය
(පාරිභා.) නා. වක්‍ර රේඛාවක ප්‍රාන්ත දෙක ක්‍රමයෙන් පළල් ව ගොස් සෑදෙන සටහන; පරවලය; පරාවලය (=parabola).