සංක්ෂිප්ත සිංහල ශබ්දකෝෂය – 489
කුපත
(කථා.) නා. (ධීව.) මුහුදේ දිය මතුපිටට නෙරා හෝ දිය යට ගිලී හෝ තිබෙන ගල්පරය.
කුපථ
නා.ප්‍ර. යෑමට අමාරු පාර; දුෂ්කර මඟ.
කුප්පනවා
1. ක්‍රි. කෝප හෝ කුපිත කරනවා.
2. ක්‍රි. ස්වාභාවික තත්ත්වය වෙනස් කරනවා; කලබල කරනවා.
කුප්පනේරුවා
(කථා.) නා. ඉඩම් පාරවල් ආදිය මනින තැනැත්තා; මිනින්දෝරුවා.
කුප්පායම
1. නා. සන්නාහයක් වශයෙන් අඳින කබායක්; යුද්ධ හැට්ටය.
2. නා. රොඩී පැල්පත
3. නා. රොඩී ගම.
කුප්පි ලාම්පුව
නා. බෝතල් කුප්පියකට පහන් වැටියක් යොදා සාදාගන්නා ලාම්පුව; ලාම්පු කුප්පිය.
කුප්පිඩුවා
(කථා.) නා. නින්දිත පුරුෂයා; අවලමා.
කුප්පිය
1. නා. (ගවයන් ගේ අංවලට දමන) කොපුව; විල්ල.
2. නා. කුඩා බෝතලය; බෝතල පිංච.
3. (කථා.) නා. පිපෙන්නට පෙර මල් කැකුළ සැඟවී ඇති කොපුව; මල් කැකුළ; මොට්ටුව.
4. (කථා.) නා. කුප්පි ලාම්පුව.
කුප්‍රකට
වි. නරක දෙයට ප්‍රසිද්ධ.
කුපාඩම
1. නා. නොහික්මුණුකම; හිතුවක්කාරකම; බලහත්කාරකම.
2. නා. පාඩම් නැතිකම; දුර්මුඛ භාවය.
කුපාඩි
වි. නින්දිත; නොහික්මුණ; සල්ලාල; අශීලාචාර.
කුපිත
වි. කෝපයට පත් වූ; කිපුණු; ඇවිස්සුණු.
කුපුරිස
නා. අවමාන, ගැරහුම ආදිය ලත් තැනැත්තා; අසත්පුරුෂයා.
කුපෝෂණය
නා. මන්දපෝෂණය (=malnutrition).
කුබහ
(කථා.) නා. වතුර බැස යෑම සඳහා කුඹුරක නියර යටින් තබන පැළූ කිතුල් කඳන් ආදිය.
කුබ්ජ
වි. පිටින් නැමුණු; කුදු.
නා.ප්‍ර. අංග හීන වූ ගෙය.
කුබුද්ධි
වි. නොමනා හෙවත් පහත් බුද්ධිය ඇති; මන්ද බුද්ධික වූ.
කුබුල් දෙනවා
ක්‍රි. නලියනවා; දඟලනවා.
කුබුස්සනවා
(කථා.) ක්‍රි. (කටට වතුර ගෙන කලතමින්) කට සෝදනවා.
කුමංජල
නා. ලාටු විශේෂයකින් සාදා ගන්නා ධූපයක්; කට්ටකුමංජල්.
කුමති
නා.ප්‍ර. වැරදි මතය; දුර්මතය; මිථ්‍යාදෘෂ්ටික අදහස.
කුමතේරු
(කථා.) නා.ප්‍ර. තක්සේරුව; වටිනාකම.
කුමදිරි
නා.ප්‍ර. (ක්‍රිස්ති.) දරුවකු ප්‍රසාද ස්නානය කරනු ලබන අවස්ථාවේ දී ඔහුගේ ආගමික අධ්‍යාපනය ආදිය භාර ව කටයුතු කිරීමට කැප වන තැනැත්තිය; ඥාන මව; මඤ්ඤා.
කුමන්ත්‍රණය
නා. පුද්ගලයෙකුට හෝ ආයතනයකට නපුරක් කරනු සඳහා රහසේ කතා කිරීම; නීතිවිරෝධි වැඩක් සඳහා කරනු ලබන රහස් සාකච්ඡාව.
කුමරි
1. නා.ප්‍ර. කන්‍යාව; වැඩිවියට නොපැමිණි දැරිය; විවාපත් නොවූ ස්ත්‍රිය.
2. නා.ප්‍ර. තරුණිය.
3. නා.ප්‍ර. ක්ෂත්‍රිය ආදි උසස් කුලයකට අයත් දැරිය.