සංක්ෂිප්ත සිංහල ශබ්දකෝෂය – 1190
මගුල් මුදුව
නා. ආවාහ විවාහ ගිවිස ගැනීම අරමුණු කර මණාලයා හා මණාලිය විසින් හුවමාරු කරගනු ලබන මුද්ද.
මගුල් රථය
නා. රාජකීය රථය ; රජුගේ වාහනය.
මගුල් ලකුණු
නා.බහු. බුදුරජාණන් වහන්සේගේ ශ්‍රී දේහයේ වූ (අති විශේෂ) මඞ්ගල ලක්ෂණ.
මගුල් සක්වළ
නා. බුදුවරුන්ගේ පහළවීම වැනි යහපත් දේ සිදුවන චක්‍රවාටය ; කාම ලෝකය.
මගුල් සලවට
නා. රජු හිඳිනා ගල් තලාව ; මංගල සම්මත වූ ශෛල වෘත්තය ; උතුම් වූ ගල්වටය.
මගුල් හීය
නා. හා හා පුරා කරන සී සෑමේ උත්සවය ; පළමු සී සෑමේ උත්සවය.
මගුලැතා
නා. මංගල හස්තියා ; රජුගේ ඇතා.
මඞ්කු
වි. ලජ්ජාවට පත් ; හැකුළුණු මුහුණු ඇති ; දුර්මුඛ.
මඞ්ගල
1. වි. ශුභ ; ඉතා යහපත් ; උතුම්.
2. විවාහ උත්සව සම්බන්ධයෙන් වූ ; මගුල් කටයුතු සම්බන්ධ.
3. පළමු ; ප්‍රථම ; පූර්ව.
මඞ්ගල දිනය
1. නා. මංගල නම් ග්‍රහයාගේ දිනය ; කුජ දිනය.
2. (නව.) මංගල උත්සව පවත්නා දිනය.
මජර
(කථා.) වි. 1. කෑමට ගිජු ; කෑදර.
2. කම්මැලි ; අලස.
මජ්ජ
1. නා.ප්‍ර. ගෙඩි ආදියේ මැද කොටස ; මදය.
2. මත්පැන්.
මජ්ජා කිරණය
නා. (උද්භි.) කඳක හෝ මුලක හෝ හරස් කඩක අරීය ඉරි වසයෙන් ද දික් කඩක සෛල තහඩු වසයෙන් ද පෙනෙන මෘදුස්තර සෛල.
මජ්ජා කූටය
නා. මැද මොළය ; මධ්‍ය මස්තිෂ්කය.
මජ්ජාව
1. නා. (ප්‍ර. යෙදේ) අස්ථි කුහරවල තිබෙන මොළොක් වූ මේද සහිත ද්‍රව්‍යය ; ඇටමිදුලු.
2. ශාකයක බඩය ; සනාල පටකයෙන් වට වී අක්ෂයක් මැද්දෙහි පිහිටා තිබෙන සෛල සිලින්ඩරය.
3. විශාල දිලීර අවයවයක තිබෙන බුරුල් දිලීර සූත්‍රිකාවලින් සමන්විත කොටස.
4. (පාරිභා.) අවයවයක හෝ පටකයක මැද කොටස.
මජ්ඣිම
වි. මැද ; මධ්‍යම.
මජ්ඣිම පටිපදාව
නා. ඒකාන්තයෙන් හේතු වන ප්‍රතිපත්තිය ; නිවනට පමුණුවන සෘජු මාර්ගය.
මඤ්චකය
නා. මඤ්චය ; ඇඳ ; යහන ; ශයනය.
මඤ්චපරායන
වි. ඇඳෙන් නැගිටිය නොහැකි ; ඇඳ ම පිහිට කොට ඇති.
මඤ්චාඩිය
නා. බර මැනීමේ මිම්මක් ; මදටිය ඇටයක බර ප්‍රමාණය ; කළඳකින් විස්සෙන් පංගුව.
මඤ්ජරි
1. නා.ප්‍ර. (මල්) පොකුර ; සමූහය.
2. (පාරිභා.) සපුෂ්ප ශාකයක කඳෙහි මල් හටගන්නා කොටස.
3. ඖෂධීය ශාකයක්.
4. සිංහ වර්ගයක්.
මඤ්ජුෂාව
නා. ලී වැල් ආදියෙන් සෑදු පෙට්ටිය.
මඤ්ඤනාව
නා. හැඟීම ; සිතීම ; වැරදි හැඟීම.