සංක්ෂිප්ත සිංහල ශබ්දකෝෂය – 1302
යූපදාරු
නා.ප්‍ර. යාගස්තම්භය හෝ ජයස්තම්භය සඳහා ගන්නා දැව කොටස.
යූපය
නා. කණුව ; ටැඹ ; ජයස්තම්භය ; ස්තූපවල ගර්භය තුළ සිට වූ කුලුන ; වෛදික සාහිත්‍යයට අනුව බිලි දෙන සතුන් බඳින කණුව.
යූරිත්‍රා
(පාරිභා.) නා.ප්‍ර. මුත්‍රාශයෙන් මුත්‍ර පහ කරන නාළයක්.
යූසෝල්
(පාරිභා.) නා.ප්‍ර. හයිපොක්ලොරස් අම්ලය අන්තර්ගත ප්‍රති-නාශකයක්.
යූහනය
නා.ප්‍ර. රැස් කිරීම ; එකතු කිරීම.
යෙදුම
1. නා. යොදන ලද දෙය ; ඉදිරිපත් කළ දෙය.
2. යම් කටයුත්තක යෙදීම.
යෙදුම් ලීවරය
(පාරිභා.) නා. මහන මැසිමේ කොටසක්.
යෙදෙනවා
1. ක්‍රි. ව්‍යාවෘත වෙනවා ; නියැළෙනවා ; නියුක්ත වෙනවා.
2. සුදුසු වෙනවා ; යෝග්‍ය වෙනවා.
යෙහෙඹි
නා.ප්‍ර. ළදරු ස්ත්‍රිය ; ළදැරිය.
යෙහෙය
නා. යහපත ; හොඳ දෙය.
යෙහෙළණි
නා.ප්‍ර. පුත්‍රයාගේ භාර්යාව ; සොහොයුරියගේ දුව ; ලේලිය.
යෙහෙළිය
1. නා. යහළු ස්ත්‍රිය ; මිතුරිය.
2. ලේලිය ; යෙහෙළණි.
යෙළ
1. නා.ප්‍ර. එකහමාර ; එකක් හා ඉන් අර්ධය.
2. අඩ ; අර්ධය ; භාගය.
යෙළ සියය
නා. එකසිය පණහ.
යේසු
නා.ප්‍ර. ක්‍රිස්තියානි ධර්මයේ නිර්මාතෘවරයා ; ක්‍රිස්තු භක්තිකයන්ගේ ශාස්තෘවරයා ; යේසුස් ක්‍රිස්තුස් වහන්සේ.
යොත
1. නා. ලණුව ; රෑන ; කඹය.
2. මසුන් ඇල්ලීමට බිලිකටු අමුණන හීන් දිග රැහැන.
යොදනවා
1. ක්‍රි. නියුක්ත කරනවා ; යෝජිත කරනවා.
2. (යමක් කිරීමට) උපාය සලසනවා; මඟක් සොයා යොමු ගන්නවා ; සැලැස්මක් තනනවා.
3. මිශ්‍ර කරනවා, කළවම් කරනවා.
4. ව්‍යඤ්ජනයක් පිසීම සඳහා පිළියෙළ කරනවා ; ඒදනවා.
යොදය
නා. උණු කළ කිරි නිවුන පසු සිවියක් වැනි ව මතුපිට මිදෙන මේද පටලය.
යොදුන
නා. පුරාණ දුර මැනීමේ ප්‍රමාණයක් ; ගවු සතරක දුර ; යෝජනය.
යොන
1. නා. උත්පත්තිය ; ජන්මය ; ජාතිය.
2. යෝනිය ; ස්ත්‍රී නිමිත්ත.
3. යොවුන් බව ; තරුණකම ; තාරුණ්‍යය.
4. තරුණිය ; යුවතිය.
යොන්
වි. යවන දේශයට අයත් ; යෝජනක.
යොන් ගී
නා. සිංහල ගී විරිතක්.
යොබළ
නා.ප්‍ර. සෙබළා ; යුද්ධ භටයා ; යෝධයා.
යොබ්බන
වි. තරුණ ; යොවුන් ; යෞවන.