සංක්ෂිප්ත සිංහල ශබ්දකෝෂය – 549
ගණවැසි කුලය
නා. ලංකාවේ පැරණි රජ පෙළපතක නාමය; ලමැණි පෙළපත; ලම්බකණ වංශය.
ගණවැසි රැකවල
නා. රජ මාලිගයේ අභ්‍යන්තර ආරක්ෂක සේවය.
ගණශාස්තෘ
නා.ප්‍ර. භික්ෂු තාපස ආදින්ගේ ගණයකට අනුශාසනා කරන ප්‍රධානයා.
ගණසජ්ඣායනාව
නා. සමූහයක් එක් ව (පිරිත් වැනි දෑ) හඬනගා කීම.
ගණසතු
වි. සමූහයකට අයිති; පිරිසකට පොදු අයිතියක් ඇති.
ගණ්ඨික
1. වි. තේරුම් ගැනීමට අපහසු; ගැටලු සහිත; ගැටමුසු; විසඳීමට අමාරු; සැඟවුණු අර්ථ සහිත.
2. වි. ගැට ගසන ලද; ගැට සහිත.
ගණ්ඨිකයා
නා. අනුන් රැවටීම පිණිස උපාය යොදන්නා; කපටියා.
ගණ්ඨිදාහය
නා. සිරුරේ ග්‍රන්ථිවල ඇති වන දැවිල්ල; ග්‍රන්ථි ප්‍රදාහය.
ගණ්ඨිපද
1. නා.ප්‍ර. තේරුම් ගැනීමට අපහසු වචන; ගැටමුසු වචන; ගැටමුසු වචන; දුරවබෝධ පද.
2. නා.ප්‍ර. අමාරු වචනවල තේරුම් පැහැදිලි කරලන ග්‍රන්ථය; ගැටපදය.
ගණ්ඨිය
1. නා. නූල්, රැහැන් වැනි දෙයක් එකට පැටලීමෙන් වූ ගැටය.
2. නා. ගස්වැල් ආදියේ කොටස් පොදි ගැසුණු තැන; උණ පුරුක් දෙකක් අතර සන්ධිය.
3. නා. ශරීර ග්‍රන්ථිය.
4. නා. විසඳීමට අමාරු ප්‍රශ්නය; ගැටමුසු තැන; දුරවබෝධ ස්ථානය.
ගණ්ඩ අස්ථිය
නා. කම්මුල් ඇටය; කපෝලාස්ථිය.
ගණ්ඩකය
1. නා. බාධාව; වෙන්වීම.
2. නා. නැකැත් ශාස්ත්‍රය.
3. නා. සතරින් සතර ගණන් කිරීමේ ක්‍රමය.
ගණ්ඩකයා
නා. කඟවේණා.
ගණ්ඩමාලය
නා. ශරීරයෙහි (ගෙළවට) වසාග්‍රන්ථි මහත් වීම ලක්ෂණ කොට ඇති රෝගයක්; ගෙළ වටා මාලයක් මෙන් ගෙඩි නැගෙන රෝගය.
ගණ්ඩය
1. නා. මුහුණේ පැත්ත; කම්මුල; කපෝලය.
2. නා. ශරීරයේ සෑදෙන ගඩුව; බිබිලි ගැටය.
3. නා. ලපය; ලකුණ; කැලල.
ගණ්ඩස්ථලය
නා. කම්මුල; කොපුල් තලය; කපෝලස්ථය.
ගණ්ඩී
නා.ප්‍ර. ආරාමයන්හි සංඝයා රැස් කිරීම සඳහා හඬවන ගෙඩිය; කුඩා ඝණ්ටාරය.
ගණ්ඩුකය
(පාරිභා.) නා. ප්‍රධාන ස්නායු පද්ධතියේ ස්නායු රාශිභූත ව සෑදුණු ගැටය; ගැංග්ලියම.
ගණ්ඩුප්පාද
1. නා.ප්‍ර. මිනිස් සිරුර තුළ ජීවත්වන පණු වර්ගයක්; බඩ පණුවා.
2. නා.ප්‍ර. පසෙහි ජීවත්වන පණු විශේෂයක්; ගැඩවිලා; ගැඩවිල් පණුවා.
ගණ්ඩූෂය
1. නා. කට පුරා ගත් ජලය හෙවත් දියර ප්‍රමාණය; වරකට කටට ගත හැකි බොන දෑ ප්‍රමාණය.
2. නා. ඖෂධ ද්‍රවයෙන් කට පුරා ගැනීමෙන් කරන ප්‍රතිකර්ම විධිය.
ගණ්‍ය
1. වි. ගණන් කළ හැකි; ගණනින් ප්‍රමාණ කළ හැකි.
2. වි. ගිණිය යුතු; ගණන් ගැනීමට සුදුසු.
ගණාධිපති
නා.ප්‍ර. ගණයකට හෙවත් සමූහයකට අධිපති; ගම් කීපයකට අධිපති භාවය උසුලන්නා.
ගණාවාසය
නා. එක් ව විසීම; සමූහයක් සමග වාසය කිරීම.
ගණි
1. නා.ප්‍ර. ගණිකාව; වේශ්‍යාව; වෙසඟන.
2. නා.ප්‍ර. ගණින්නාන්සේ.