සංක්ෂිප්ත සිංහල ශබ්දකෝෂය – 1544

විරූපීකරණය

නා. විකෘති කිරිම.

විරූහණය

1. නා. පැළවීම ; අංකුර නැඟීම.
2. දියුණුවීම ; වැඩීම.

විරූළ්හය

නා. නැවත නැවත හටගැනීම ; නැවත නැවත ඉපදීම ; පුනරුත්පත්තිය.

විරූළ්හි

නා.ප්‍ර. වැඩීම ; වර්ධනය වීම.

විරේකය

1. නා. අපද්‍රව්‍ය බැහැර කිරීම.
2. අපද්‍රව්‍ය බැහැර කරන ඖෂධය.

විරේකාබාධය

නා. අධික ලෙස විරේචනයවීමේ ආබාධය ; අතීසාරය ; පාචනය.

විරේචකය

1. නා. බඩ ශුද්ධ වීම සඳහා දෙන ඖෂධය ; විරේක බෙහෙත.
2. (ඖෂධ භාවිතයෙන්) මළ පහ කිරීම.

විරෝචන

1. වි. බබළන ; දිලිසෙන.
1. නා.ප්‍ර. බැබළීම ; දිලිසීම.
2. සක් දෙවිඳුන් කුසරජුට පැළඳ වූ අෂ්ටවඞ්ක මාණික්‍යය.
3. සූර්යයා.

විරෝචිත

වි. බැබළුණු.

විරෝධය

1. නා. විරුද්ධතාව ; පටහැනිවීම ; එකගනොවීම.
2. නොගැළපෙන දෙය.
3. නුසුදුසු බව ; වැරදි කාර්යය.
3. සම්ප්‍රදායට නොගැළපීම.

විරෝධි

වි. විරුද්ධ ; ප්‍රතිපක්ෂ.

විරෝධෝක්තිය

නා. විරුද්ධව ගෙනහැර දක්වන කරුණ ; විරුද්ධ කියමන.

විල

1. නා. ඉබේ හටගත්, ගොඩබිමෙන් වට වූ ජලාශය ; තඩාගය.
2. පඩික්කම.
3. මළ පහ කරන භාජනය ; පිස්පෝච්චිය.
4. දුන්න.

විලංගුව

නා. සිරකරුවන්, උම්මත්තකයින් සහ මෙල්ල කිරීමට අපහසු අලි ඇතුන් ආදී සිව්පාවුන් පාලනය කිරීමට අත් හෝ පා හිරවන සේ දමන උපකරණය ; මාංචුව.

විලක්කුව

නා. වියළි ලීයක පාංකඩ ඔතා තෙල් ගල්වා සාදනු ලබන, විශේෂයෙන් තොවිල් පවිල් සඳහා ගැනෙන කුඩා පන්දමක් ; රාත්‍රි කාලයේදී ගමන් බිමන් යෑම සඳහා උපයෝගී කරගන්නා කුඩා පන්දම් විශේෂය.