සංක්ෂිප්ත සිංහල ශබ්දකෝෂය – 161
අරක්වළ
නා. ආරක්ෂා ද්‍රව්‍ය තැබීම සඳහා කමතක් මැද හාරන කුඩා වළ.
අරගලය
නා. දබරය; ආරවුල; කෝලාහලය.
අරඤ්ඤ
නා. ආරණ්‍යය; වනය.
අරඤ්ඤායතනය
නා. භික්ෂූන් සඳහා අරණ්‍යයෙහි වූ ආයතනය; වනවාසී භික්ෂු ගණය.
අරටුව
නා. සාරය; ගසක කඳේ මේරූ මැද කොටස; හරය.
අරණ
නා.ප්‍ර. ආරණ්‍යය; වනය.
අරණ්‍ය
නා. වනය; කැලෑව.
අරණ්‍යවාසියා
නා. ආරණ්‍යයෙහි වසන්නා; වනවාසියා.
අරණි කාෂ්ඨය
නා. ගිනිගෑම පිණිස ගන්නා දඬුව; ගිනි ගානා දණ්ඩ.
අරණි මථනය
නා. ගිනි ගානා දඬු එකට ගැටීම; ගිනි නැංවීම පිණිස ලී දඬු දෙකක් එකට මැදීම.
අරතර
1. වි. අරටුවෙන් තර වූ; හර සහිත වූ.
2. වි. ඉතා දැඩි; දෘඪතර; ස්ථිරතර.
3. වි. උතුම් වූ; බලවත් වූ.
අරතිය
නා. නොඇල්ම; අරුචිය; පිළිකුල; කලකිරීම.
අරනවා
1. ක්‍රි. නගිනවා; ආරෝහණය කරනවා.
2. ක්‍රි. සිද්ධ වෙනවා; පිහිටනවා.
3. ක්‍රි. (අත් ආදිය) ඔසවනවා.
අරන්ධ්‍ර
වි. පැල්මක් නැති; සිදුරු නැති.
අරපරිස්සම
නා. සුරක්ෂිත භාවය; ආරක්ෂාව; සකසුරුවම්කම; පරෙස්සම.
අරපිරිමැස්ම
(කථා.) නා. අඩු වියදමෙන් කටයුතු කර ගැනීම; සකසුරුවම.
අරබයා
නි. (පටන්ගෙන යනු වාච්‍යාර්ථයි) උදෙසා; නිසා; ගැන; මුල් කොට; සඳහා.
අරම
නා. භික්ෂූන් හෝ තාපසයන් හෝ වසන තැන; ආරාමය.
අරමිණිය
නා. දෙපා නමා බැඳ හිඳීම; පර්යඞ්කය.
අරමුණ
1. නා. (අභි.) සිත ක්‍රියා කරවීමට පදනම් වන දෙය; සිතට ගෝචර වන දෙය; චක්ෂුරාදි ඉන්ද්‍රිය වෙත ගෝචර වන රූපාදිය.
2. (අභි.) නා. අදහස; අභිප්‍රාය; ඉලක්කය.
3. නා. උවමනාව; අවශ්‍යතාව.
අරමුදල
1. නා. රාජකීය ධනය තැන්පත් කොට තබන ස්ථානය; භාණ්ඩාගාරය.
2. නා. රක්ෂිත මුදල; තැන්පත් මුදල; ව්‍යාපාරයක යොදන මුල් මුදල.
අරඹනවා
ක්‍රි. පටන් ගන්නවා; ආරම්භ කරනවා.
අරය
1. නා. රෝදයක ගරාදිය; රිය සකක දැවිය.
2. (පාරිභා.) නා. වෘත්තයක කේන්ද්‍රයේ සිට පරිධිය දක්වා අඳින ලද සරල රේඛාව; අර්ධ විෂ්කම්භය.
3. නා. අරටුව; සාරය.