අක්ෂර වින්‍යාස ශබ්දකෝෂය – 208
ප්‍රාමාණ්‍ය
වි. සාක්ෂ්‍ය මගින් තහවුරු වන; සම්මුතියට අදාළ (සං. ප්‍රාමාණ්‍ය)
ප්‍රාමාණික
වි. පිළිගත හැකි; ප්‍රමාණවත් නුවණක් ඇති/ සම්මත (සං. ප්‍රාමාණික)
ප්‍රාරම්භය
නා. ආරම්භ කිරීම; පටන් ගැනීම (සං. ප්‍රාරම්භ)
ප්‍රාර්ථනය
නා. පැතුම; බලාපොරොත්තුව (සං. ප්‍රාර්ථන, ප්‍රාර්ථනා)
ප්‍රාවරණය
නා. පොරෝණය/ මෘද්වංශීන්ගේ ශරීරය වසා ඇති සම් වැදැල්ල (සං. ප්‍රාවරණ)
ප්‍රාසංගික
1. වි. ඉබේ සිදුවන/ ස්වාභාවික (සං. ප්‍රාසාංගික) 2. නාට්‍යමය හෝ කාව්‍යමය හෝ ගීතමය අවස්ථාවලින් යුත්
ප්‍රාස්තාවික
වි. අවස්ථාවට සුදුසු (සං. ප්‍රස්තාව+ඉක)
ප්‍රිය විප්‍රයෝගය
නා. තමා කැමති දෙයින් වියෝ වීම (පා. පියවිප්පයොග)
ප්‍රියසම්භාෂණය
නා. සතුටු සාමීචි කථාව (සං. ප්‍රියසම්භාෂණ)
ප්‍රීණනය
නා. සතුටු වීම; ප්‍රීති වීම (සං. ප්‍රීණන)
ප්‍රීත්‍යුත්සවය
නා. ප්‍රීති වීමට හා විනෝද වීමට පැවැත්වෙන උත්සවය; සාදය
ප්‍රේක්ෂකයා
නා. රූපවාහිනී, සිනමාපට, නාට්‍ය ආදිය නරඹන්නා (සං. ප්‍රෙක්‍ෂක)
ප්‍රේක්ෂණය
නා. ඇසින් හෝ නුවණින් බැලීම (සං. ප්‍රෙක්‍ෂණ)
ප්‍රේමණීය
වි. පෙම් කළ යුතු; ආදරණීය (සං. ප්‍රෙමණීය)
ප්‍රේරණය
නා. මෙහෙයවීම; යැවීම (සං. ප්‍රෙරණ)
ප්‍රේෂණ
නා.ප්‍ර. චෙක්පත්, අණකර ආදිය මගින් කෙනකුගෙන් තවත් කෙනකුට යැවෙන මුදල/ යම් තැනකින්, අවස්ථාවකින් හෝ ක්‍රමයකින් අන් තැනක් වෙත ගමන් කිරීම; සංක්‍රාන්තිය (සං. ප්‍රෙෂණ)
ප්‍රොතෙස්තන්ත
නා.ප්‍ර. රෙපරමාදු ආගම (ඉං. protestant)
ප්‍රෝඩාව
නා. ප්‍රයෝගය; වංචාව (ඉං. fraud)
ප්‍රෞඪ
වි. උදාර; අභිමානයෙන් යුත්/ මැදිවියේ සිටින (සං. ප්‍රෞඪ)
පා සලඹ
නා. පා වළල්ල; නූපුරය
පාංශු
නා.ප්‍ර. පස්; මැටි; දූවිලි/ පෝර (පා. පාංසු සං. පාංශු)
පාංශු වයනය
නා. බීජ රෝපණය සඳහා බිම සැකසීම
පාංශුකූල චීවරය
නා. පාංසුකූල චීවරය
පාංශුකූලය
නා. මතක වස්ත්‍රය/ සොහොන් බිම් ආදී තන්හි අහුලාගත් රෙදිවලින් තැනූ සිවුර/ අවමඟල් උත්සවය (පා. පංසුකූල සං. පාංශුකූල)