අක්ෂර වින්‍යාස ශබ්දකෝෂය – 64
උළු පැන් ගෙය
නා. උණු වතුර නෑම සඳහා වූ ගෘහය
උළුක්කුව
නා. සන්ධියක් පැනීම; අවසන්ධි වීම (දෙ. உளுக்கு)
උළුඳු
නා. ධාන්‍ය විශේෂයක් (දෙ. உழந்து)
උළුවස්ස
නා. දොර රාමුව
ඌන
වි. අඩු; අසම්පූර්ණ (පා. සං. ඌන)
ඌන පූරණය
නා. අඩුව පිරවීම; අඩුව සම්පූර්ණ කිරීමට යෙදූ දෙය (සං. ඌන+පූරණ)
ඌන සංවර්ධිත
වි. සංවර්ධනය සම්පූර්ණත්වයට නොපැමිණි
ඌන සාමර්ථ්‍යය
නා. අසම්පූර්ණ ලෙස ලබන සමත් බව (සං. ඌන+සාමර්ථ්‍ය)
ඌනනය
නා. අඩු කිරීම; හායනය
ඌර්ණ
නා.ප්‍ර. එළු බැටළු ආදීන්ගේ ලොම්/ ඌර්ණ රෝම ධාතුව (සං. ඌර්ණ)
ඌර්ණරෝම ධාතුව
නා. බුදුරදුන්ගේ දෙබැම මැද දකුණට කරකැවී පිහිටා තිබූ සිනිදු දිග රෝමය (සං. ඌර්ණරොම+ධාතු)
ඌර්ධ්ව
වි. ඍජු/ ඉහළින් පිහිටි; උඩු (සං. ඌර්ධව)
ඌර්ධ්වක්ෂේපණය
නා. උඩට විසි කිරීම; උඩ දැමීම (සං. ඌර්ධ්වක්‍ෂෙපණ)
ඌර්ධ්වකාය
නා.ප්‍ර. උඩුකය (සං. ඌර්ධ්වකාය)
ඌර්ධ්වමුඛ
වි. උඩට හැරුණු; උඩුකුරු (සං. ඌර්ධ්වමුඛ)
ඌර්වස්ථිය
නා. කළවා ඇටය (සං. ඌර්වස්ථි)
ඌරුබද්ධාසනය
නා. වම් හා දකුණු කළවා සම ව තබා දෙපා නමා ඉඳීම (පා. ඌරුබද්ධාසන)
ඌල
නා. උල්පත
ඌෂ්ණය
නා. උෂ්ණය/ දුර්ගන්ධය (සං. උෂ්ණ)
ඌෂ්මකය
නා. අධික උෂ්ණත්වයක් දෙන උදුන
ඌෂ්මාක්ෂර
නා.ප්‍ර. උණුසුම් වායු ධාරාවක් මුඛයෙන් පිට කෙරෙමින් ශබ්ද වන ශ, ෂ, ස, හ, ෆ යන අකුරු (සං. ඌෂ්මන්+අක්ෂර)
ඌළියක්කාරයා
නා. මෙහෙකාරයා (දෙ. ஊழியக்காரன்)
ඌළියම
නා. දේව පූජාව; දේව මෙහෙය/ අතීතයේ දී කුලහීනයන් විසින් කුලීනයන් වෙනුවෙන් කරන ලද දෝලා ගෙනයාම, දර දිය ඇදීම වැනි සේවාව/ අතීතයේ දී වෙළඳාමේ යෙදුණු විදේශිකයන් විසින් රජයට කළ යුතු වූ අනිවාර්ය සේවාව (දෙ. ஊழியம்)
ඌළියම් බද්ධ
නා. මහනුවර යුගයේ දී ලංකාවේ වෙළඳාම් කළ විදේශිකයන් විසින් රජයට ගෙවූ බද්ද