සංක්ෂිප්ත සිංහල ශබ්දකෝෂය – 1076
පාසු
1. වි. කරදර පීඩා නැති ; අමාරුවක් නැති ; අවකාශ ඇති ; පහසු.
2. රෝගයකින් ව්‍යාධියකින් පීඩා විඳ ලබන සුවය නිසා සැප වේදනා දැනෙන.
පාහර
වි. පහත් ; නීච ; ජඩ ; නින්දිත.
පාහිනවා
ක්‍රි. ධාන්‍ය ඇටවල කුඩ්ඩ ඉවත් කරනවා ; හාල්වල නිවුඩු හරිනවා ; ශුද්ධ කරනවා ; ගසක අතු කපනවා ; අත්තක කොළ සහිත නටු කපා හරිනවා.
පාහුරුව
නා. පාදයේ ක්‍රියාකාරිත්වය ; ගමන ; පාදයේ හුරුකම.
පාළු
වි. හිස් ; ශුන්‍ය ; ජනශූන්‍ය.
පාළුපස
නා. ඛනිජ සහ පෝර නැති නිසරු පස.
පාළුව
1. නා. හිස් බව ; ජනාවාසයන්ගෙන් තොර බව ; නිහඬකම.
2. ගොවිතැන් ආදියෙහි අස්වැන්න නැතිවීම.
පැංචා
නා. පොඩි කොලුවා ; පිරිමි දරුවා ; පිරිමි ළමයා.
පැකිලෙනවා
1. ක්‍රි. හැපෙනවා ; පටලැවෙනවා ; ගැටෙනවා.
2. පසුබට වෙනවා.
පැගෝඩා
නා.ප්‍ර. ඈත පෙරදිග (චීනය බුරුමය ආදි) රටවල දක්නට ලැබෙන ආගමික ගොඩනැගිලි විශේෂයක් ; දාගැබ.
පැඟිරි
1. නා.ප්‍ර. දෙහි, දොඩම්, නාරන් ආදියේ ලෙල්ලෙහි ඇති සැර සුවඳ.
2. එහි යුෂ.
3. නාරං වර්ගයට අයිති දෙහි, දොඩම් ආදි ගස්.
4. පැඟිරිමානා ; පැඟිරි සුවඳැති උස තෘණ විශේෂය.
5. එයින් සිඳ ගැනෙන සුවඳැති තෙල්.
පැටලිල්ල
නා. අවුල ; ව්‍යාකූලත්වය.
පැටවා
1. නා. නොවැඩුණු අවස්ථාවේ සිටින සතා ; පැටියා ; පෝතකයා.
2. කුඩා පිරිමි දරුවා ; ළාබාලයා.
පැටවුම
1. නා. අන්තර්ධාන වීම ; අතුරුදහන්වීම ; නොපෙනී යෑම ; සැඟවීම.
2. බඩු භාණ්ඩ ගෙනයාම පිණිස වාහන ආදියක තැන්පත් කිරීම ; පැටවීම.
පැට්‍රෝලියම්
නා.ප්‍ර. ස්වාභාවික ව ළිංවලින් ලබාගන්නා ගිනි ගන්නා සුලු තෙල් ; ඛනිජ තෙල්.
පැටි
1. වි. ප්‍රකට ; ව්‍යක්ත.
2. මුවා වුණු ; සැඟවුණු.
3. නියුක්ත ; යෙදුණු.
4. බාල ; ළදරු ; කුඩා ; පෝතක.
පැටිකිරිය
නා. පරම්පරාගත අයිතිය හැඟවෙන පරපුරු ලේඛනය ; ඉඩම් ඔප්පුවල සටහන් කෙරෙන පරම්පරාවලිය.
පැටිලිය
නා.ප්‍ර. කුඩා දැරිය ; දාරිකාව ; පොඩිත්තිය.
පැණ
1. නා.ප්‍ර. ප්‍රකට කොට දැනීම ; විශිෂ්ට වූ දැනුම ; මනාදැනීම ; ප්‍රඥාව.
2. පිළිවිසිය යුතු ගැටලුව ; විමසිය යුතු කරුණ ; ප්‍රශ්නය.
3. පුන්කලස ; පූණ ඝටය.
පැණැති
වි. නැණවත් ; ඥානවන්ත ; ප්‍රඥාගුණයෙන් යුත්.
පැණි
1. නා.ප්‍ර. තෙලිදිය උණු කිරීමෙන්, මී බඹර වදවලින් සහ උක්ගස් ආදියෙන් ලබාගන්නා මිහිරි රසැති උකු ද්‍රවය.
2. මල්වල මකරන්දය.
3. ප්‍රාණියා ; ජීවිතය ඇති සත්ත්වයා.
4. පණුවාගේ ගෑණු සතා.
5. වලග ; නගුට.
6. ලාටු.
පැණිතෝරමල්ලි
නා.ප්‍ර. මැණික් වර්ගයක් ; තෝරමල්ලි නම් වූ මැණික් වර්ග පහෙන් එකක්.
පැණිරස
වි. මිහිරි රසය ඇති ; මධුර රසයෙන් යුක්ත.
නා.ප්‍ර. සීනි පැණි ආදියෙහි රසය ; මිහිරි රසය ; මධුරත්වය.
පැතලි
1. වි. සමතලා ; මට්ටම්.
2. ඝනකම අඩු ; තුනී.