සංක්ෂිප්ත සිංහල ශබ්දකෝෂය – 1507
වැසිකිළිය
නා. මලපහ කරන කුටිය ; වර්චස් කුටිය ; කක්කුස්සිය.
වැසිකිළිවත
නා. වැසිකිළි භාවිතය සම්බන්ධයෙන් භික්ෂූන්ට පනවා ඇති පිළිවෙත.
වැසිකෝඩය
1. නා. වැහිකළුව ; වැසි අඳුර.
2. වැස්ස.
වැසිපටලය
නා. වැසි ජලය සහිත වලාව ; වැහි වලාකුළ ; කළු වලාකුළ.
වැසිපලය
නා. යම්කිසි ප්‍රදේශයකට ලැබෙන වැසි ප්‍රමාණය ; වර්ෂාපතනය.
වැසිපිරිත
නා. නියං කාලවල දී වැසි වැස්වීම සඳහා භාවිත කරන පිරිත ; මත්සරාජ පිරිත.
වැසිපොද
නා.ප්‍ර. වැසිබිංදු ; වැසිදිය බිංදු.
වැසිවදල
නා. වැහි වළාකුළ ; වැහිවදුල.
වැසිසළුව
නා. වස් වසන භික්ෂූන්ට වැසි සාරමස ප්‍රයෝජනය සඳහා පූජා කෙරෙන වස්ත්‍රය.
වැහැප්
1. නා.ප්‍ර. වෘෂභයා ; ගොනා ; හරකා.
2. උත්තමයා ; ශ්‍රේෂ්ඨයා ; උසස් පුද්ගලයා.
3. පුරාණ රජෙකු වූ වසභ රජු.
වැහැය
නා. දැව සැපයීමට ගන්නා (කුඩා උදැල්ලක් වැනි) උපකරණය.
වැහැරී
1. නා.ප්‍ර. ගසක පට්ටා විශේෂයක් ; හණ.
2. රුක් පට්ටාවලින් කළ වස්ත්‍ර වර්ගයක්.
3. වැහැරී චීවරය ; සිවුර.
වැහැරෙනවා
1. ක්‍රි. කෙට්ටු වෙනවා ; කෘශ වෙනවා ; දුර්වල වෙනවා.
2. ව්‍යවහාර වෙනවා.
වැහිඅත්
නා.ප්‍ර. වාහනය ; රථය.
වැහිතළනවා
ක්‍රි. වැස්සෙන් අනතුරු හෝ පීඩා සිදුවෙනවා.
වැහිබීරුම
නා. වැසි ඇති විමේ ලකුණු ; වැහි අඳුර.
වැහෙනවා
1. ක්‍රි. වහනය වෙනවා ; වෑස්සෙනවා.
2. ආවරණය වෙනවා ; වැසී යනවා.
3. යක්ෂ භූත ආදින් ආරූඪ වෙනවා ; යක්ෂ භූත බලවේගයකට නතුවෙනවා.
වැළ
1. නා.ප්‍ර. පැත්ත ; පාර්ශ්වය.
2. පංතිය ; පෙළ.
3. වෙරළ ; ඉවුර.
4.තොටුපළ.
වැළඳෙනවා
ක්‍රි. බෝවෙනවා ; ඇති වෙනවා.
වැළමිට
නා.ප්‍ර. බාහුවේ ඉහළ කොටසත් පහළ කොටසත් සම්බන්ධ වන සන්ධිය.
වැළැක්ම
1. නා.ප්‍ර. යමක් සිදුවීමට ඉඩ නොදීම ; බාධා කිරීම.
2. තහනම් කිරීමේ දඬුවමක්.
වෑ
1. නා.ප්‍ර. බළල් වර්ගයට අයත් මාංශ භක්ෂක සිව්පාවෙක් ; ව්‍යාඝ්‍රයා ; වග.
2. ජලාශය ; වැව ; වාපිය.
3. දත්, කන් ආදි ස්ථානයන්හි ආබාධ සදතැයි සැලකෙන ක්ෂුද්‍ර ප්‍රාණී විශේෂයක්.
වෑ කණ්ඩිය
නා. වැවක වතුර රඳවා තැබීම සඳහා බඳිනු ලබන බැම්ම ; වෑකන්ද.