සංක්ෂිප්ත සිංහල ශබ්දකෝෂය – 475

කිතුසමය

නා. ක්‍රිස්තු ලබ්ධිය; ක්‍රිස්තියානි ආගමය.

කිදැළ

නා. කුඩා ඇළ; දිය කඩිත්ත; දියවළ.

කින්නර

1. නා.ප්‍ර. අස් මුහුණු හා මිනිස් සිරුරු නැත හොත් මිනිස් මුහුණු හා අස් සිරුරු ඇතැයි කියන සත්ත්ව වර්ගය; දසවැදෑරුම් දේවයෝනි අතුරෙන් එකකි.
2. නා.ප්‍ර. පැරණි තූර්ය භාණ්ඩයක්.

කින්නර පොළිය

1. නා. මිශ්‍ර පොළිය; වැල්පොළිය.
2. නා. අධික පොළිය; ගිනි පොළිය.

කින්නරය

නා. ඇතුන් මෙහෙයවීමට භාවිත කරන කෙළවර කටුවක් සහිත කෙවිට; හෙණ්ඩුව.

කිනිත්ත

නා. කුඩා අත්ත; කුඩා රිකිල්ල; මල් ඉත්ත; කැනැත්ත.

කිනිස්ස

නා. මිටක් සහිත දෙපිට කැපෙන උල් අවිය; කිරිච්චිය; සිරිය.

කිඳ

(කථා.) නා.ප්‍ර. දිය පිරුණු ලොකු වළ; ජලාශය.

කිඳනවා

ක්‍රි. දිය යට යනවා; දියෙහි ගිලෙනවා.

කිඳාබසිනවා

1. ක්‍රි. දිය යට යනවා; දියෙහි ගිලෙනවා.
2. ක්‍රි. එරෙනවා; මඩෙහි ගිලෙනවා.
3. ක්‍රි. රූරා බසිනවා; පොළොව යටට ඇදී යනවා.
4. ක්‍රි. ඇතුළත් වෙනවා; අන්තර්ගත වෙනවා.