සංක්ෂිප්ත සිංහල ශබ්දකෝෂය – 923
නිම්මදන
නා.ප්‍ර. මැඩලීම; යටපත් කිරීම.
නිම්මදය
නා. උඩඟුකමින් තොර වීම; මාන රහිත භාවය; නිරහංකාරය.
නිම්මල
වි. පිරිසිදු; පවිත්‍ර; නිර්මල.
නිමානය
(පාරිභා.) නා. යම්කිසිවක අගය හෝ තරම හෝ සලකා බැලීම; නිර්ණනය (=estimation).
නිමායන්ත්‍රය
(පාරිභා.) නා. භාණ්ඩයක නිමාව සකස් කරන යන්ත්‍රෝපකරණය (=finishing machine).
නිමාව
1. නා. අවසානය; කෙළවර වීම; පරිසමාප්තිය.
2. නා. කාර්ය සිද්ධිය; නිෂ්පත්තිය.
3. නා. නිමැවුම; නිර්මාණය.
නිමැවුම
1. නා. නිෂ්පාදන කටයුත්තක අවසානය; ක්‍රියා නිෂ්පත්තිය; පරිසමාප්තිය.
2. නා. නිර්මාණය; අමුතුවෙන් තැනීම.
3. නා. වෙළඳ ද්‍රව්‍යයක මුළු මහත් නිෂ්පාදිතය (=output).
නිමැවුම්කරු
නා.ප්‍ර. යමක් අලුතෙන් නිපදවන්නා; නිර්මාපකයා; යමක් ප්‍රථම වශයෙන් නිපදවන්නා.
නිමි
නා.ප්‍ර. අවසානය; කෙළවර; සමාප්තිය; නිෂ්ඨාව.
නිමි ටැප් කටුව
(පාරිභා.) නා. සිදුරක පතුල තෙක් සම්පූර්ණයෙන් පොට කැපීමට භාවිත කරන උපකරණය; පතුල් කටුව.
නිමිත
1. නා. සලකුණ; සංඥාව; සංකේතය; ඉඟිය.
2. නා. ලිංගේන්ද්‍රිය; පුරුෂ ලිංගය / යෝනිය.
3. නා. යෝගාවචරයකු අරමුණු වශයෙන් ලබා ගන්නා දෙය.
1. වි. නිර්මාණය කරන ලද; සාදනු ලැබූ.
2. වි. ප්‍රමාණය සලකනු ලැබූ; මනින ලද.
3. වි. සලකුණක් වශයෙන් ගැනෙන.
4. වි. මනින ලද.
නිමිත තාරබර
(පාරිභා.) නා. ගණන් ගනු ලැබූ දැවටුම් ආදියෙහි බර (=estimated tare).
නිමිත මුදල්
නා.ප්‍ර. සංකේතයක් ලෙස පමණක් භාවිත වන්නා වූ ද මතුපිට සඳහන් වටිනාකමට සමාන ලෝහ ප්‍රමාණයකින් නොසෑදූ කාසි.
නිමිත්ත
1. නා. සිදුවිය හැකි ඉටුනිටු කරුණු පිළිබඳ ව පහළවන සලකුණ; පෙර නිමිත්ත.
2. නා. හේතුව; මුල් වූ කාරණය; නිදානය.
නිමිතිකරුවා
නා. සලකුණු, තත්කාලය ආදිය අනු ව පලාපල කියන්නා; නිමිත්ත පාඨකයා; නෛමිත්තකයා.
නිමිභාණ්ඩ
නා.ප්‍ර. අවශ්‍ය අමුද්‍රව්‍ය එක් කොට සාදා නිම කළ භාණ්ඩ.
නිමිස
නා. කාලය මැනීමේ මිම්මක්; මාත්‍රාවක් උච්චාරණය කිරීමට ගතවන කාලය; ඇසිපියක් හෙළීමේ කාලය.
නිමිහිම්
නා.ප්‍ර. අවසන් සීමාව; ප්‍රමාණය; මට්ටම; පරිමාණය.
නිමීලන පටලය
නා. ඇස වසා ගැනීමට යොදා ගත හැකි වන සේ ඇතැම් සතුන්ගේ ඇස්වල අමතර ව පිහිටි සිවිය; තුන් වන ඇසිපිය.
නිමීලනය
නා. (ඇසිපිය, මල්පෙති වැනි දේ) වැසීම; ඇසිපිය හෙළීම.
නිමීලයෝගය
(පාරිභා.) නා. මණි විවෘත නොවී පරාග පෝෂණය වන කුඩා අසංකීර්ණ මල් හටගැනීම (=cleistogamy).
නිමීලිත
වි. පියූ; වැසූ.
නිමුජ්ජනය
නා. කිඳීම; ගිලීම.
නිමුන්
වි. යුගල; යුග්ම; නිඹුල්; නිවුන්.