සංක්ෂිප්ත සිංහල ශබ්දකෝෂය – 931

නිරවද්‍යය

1. නා. වරදින් තොරවූව; දෝෂයක් නොමැති දෙය; අඩුලුහුඬුකමක් නොමැති දෙය; යහපත් දෙය.
2. නා. දෝෂයක්, අඩුලුහුඬුකමක්, වරදක් නොමැතිබව.

නිරවධි

වි. සීමාවක් නැති; අප්‍රමාණ.

නිරවනත

වි. නොනැමුණු; ඇද නැති; කෙළින්.

නිරවබෝධය

වි. තේරුම් නොගත් බව; අවබෝධයක් නැතිකම; නොදත්කම.

නිරවයව

[නිර් + අවයව]
වි. අවයව නැති; කොටස් රහිත; උපාඞ්ග වලින් තොර.

නිරවරෝධ

වි. බාධාවකින් තොර; විරුද්ධත්වයක් නැති.

නිරවශිෂ්ට

1. වි. ඉතිරියක් නැති; සම්පූර්ණ; සියලු; අනූන.
2. වි. වෙනස් නොවන; ඒකාන්ත; සර්වග්‍රාහී
3. (දර්ශන.) වි. අවශ්‍ය වූ ද වැදගත් වූ ද සියල්ල ඇතුළත් වන; සවිස්තර.

නිරවශේෂය

1. නා. සම්පූර්ණයෙන් අවසන් කිරීම; කම්මුතුව.
2. නා. විනාශය.

නිරවසාන

වි. අවසන් නොවූ; කෙළවරකට පත් නොවූ.

නිරවැද්ද

නා.ප්‍ර. නිවරැද්ද; නිරවද්‍ය.

නිරවුල්

වි. අවුලක් නැති; පැටලීමක් නොමැති; නිරාකුල; පැහැදිලි.

නිරවුල් කරනවා

1. ක්‍රි. අවුල් හරිනවා; දුෂ්කර ස්ථාන පැහැදිලි කරනවා; ගැටමුසු තැන් තේරුම් කරනවා.
2. ක්‍රි. බේරුම් කරනවා; සමථ කරනවා; සම්බාධක දුරු කරනවා.
3. ක්‍රි. වියවුලින් තොර කරනවා; සාමය ඇති කරනවා.