සංක්ෂිප්ත සිංහල ශබ්දකෝෂය – 560
ගම්පිඬිය
නා. ගමේ මුලාදෑනියාට ගෙවිය යුතු පංගුව; ග්‍රාම පිණ්ඩය.
ගම්පියස
නා. මිනිසුන් පදිංචි ප්‍රදේශය; ගම් පෙදෙස.
ගම්පොළයා
නා. සියුම් කපටි නුවණ ඇත්තා; කූට බුද්ධි සම්පන්නයා.
ගම්බද
වි. ගම හා සම්බන්ධ; ගමට අයත්.
ගම්බාරයා
(කථා.) නා. ගමේ මුලාදෑනියා.
ගම්බික
නා.ප්‍ර. ගමෙහි පිඬු සිඟීමෙන් (භික්ෂුවකට) ලැබෙන ආහාරය; ගමෙන් ලැබෙන පිණ්ඩපාත දානය.
ගම්බෙත්මය
නා. ඉඩම් බෙදීම; ඉඩම් වෙන් කර ගැනීම.
ගම්භාර දේවතාවා
නා. ගමක් භාර ව සිටිතැයි සැලකෙන දේවතාවා; ගමට අධිගෘහිත දේවතාවා; සූනියම් දේවතාවා.
ගම්භීර
1. වි. මතුපිට සිට පතුලට (ප්‍රමාණානුකූලව) වැඩි දුරක් ඇති.
2. වි. ඈතට විහිදී ගිය; පුළුල්; ගැඹුරු.
3. වි. මහත් සේ පැතිර යන.
4. වි. දුරට විමසා බැලීමේ නුවණ ඇති; සියුම් නුවණින් තේරුම් ගත යුතු.
නා.ප්‍ර. (ගංගා, මුහුදු ආදියේ) පතුලේ සිට මතුපිටට දුර; භාජන ආදියේ ද්‍රව්‍ය අල්ලන හරියේ උස; ඝන ප්‍රමාණය.
ගම්භීරාරණ්‍යය
[ගම්භීර + ආරණ්‍යය]
නා. මහත් වූ කැලෑව; ඇතුළට විහිද ගිය ඝන වනය.
ගම්භීරාර්ථ
[ගම්භීර + අර්ථ]
නා.ප්‍ර. තේරුම් ගැනීමට අපහසු අර්ථය; ගැඹුරු තේරුම.
ගම්මඩුව
නා. ගමට සෙත් ශාන්තිය පතා ගම්මුන් එකතු ව පවත්වන දේවපූජා විශේෂයක්.
ගම්මණ්ඩිය
1. නා. ගෙවල් ගණනක් තිබෙන කුඩා ගම් පෙදෙස; ගම්ගොඩ.
2. නා. කුඹුරු යාය ආදියෙන් ඔබ්බෙහි වූ ගමේ ගෙවල් තිබෙන ප්‍රදේශය; ගම්මානය.
ගම්මහ
1. නා. ගමේ කටයුතු භාරව සිටි නිලධාරියා; ගමේ ප්‍රධානයා.
2. (කථා.) නා. යකඩ වැඩ කරන්නා; කම්මල් ආචාරියා.
ගම්මානය
නා. එකයායට ගෙවල් තිබෙන ප්‍රදේශය; ගම්මණ්ඩිය; ගම්මැද්ද.
ගම්මැදි හෑල්ල
නා. ගමේ ගොඩේ පවතින වැඩකට නැති නිස්සාර කතාව; තේරුමක් නැති කතාව; ප්‍රලාපය.
ගම්මුදල
1. නා. ගමෙන් ලැබෙන ආදායම.
2. නා. ගමේ ගෙවල් පිහිටි භූමි භාගය.
ගම්මුදලියා
නා. ගමක පාලනය භාර ව සිටි ප්‍රධාන නිලධාරියා; ගම්පතියා; ග්‍රාම භෝජකයා.
ගම්මුලාදෑනියා
නා. රජය වෙනුවෙන් ගමේ කටයුතු භාර ව සිටින නිලධාරියා; ගම්පති.
ගම්රාජකාරිය
නා. රජයෙන් ලැබුණු ඉඩම හෝ ඉඩම් වෙනුවෙන් ප්‍රදේශීය රදළවරයාට ඉටු කළයුතු මෙහෙවර; ඉඩම් වෙනුවෙන් කළ යුතු රාජකාරිය.
ගම්ලද
1. වි. (රජුගෙන්) ගම්වර ලැබූ.
2. වි. බලාත්කාරයෙන් අන්සතු ඉඩම් අල්ලාගත්; ඉඩම් කොල්ලකාගත්.
ගම්ලදුවා
1. නා. රජුගෙන් ගම්වර ලත් තැනැත්තා.
2. නා. නින්දගම් හිමියා.
3. නා. ගමක ආදායම සහ සේවා බුක්ති විඳින තැනැත්තා; ගම්මුදලියා; ග්‍රාමභෝජකයා.
ගම්වදිනවා
නා. ගමට ප්‍රවේශ වෙනවා; ගමට ඇතුළු වෙනවා.
ගම්වර
1. නා.ප්‍ර. විහාර දේවාල ආදියෙන් නඩත්තුව සඳහා දෙනු ලබන ගම් හෝ ඉඩම්.
2. නා.ප්‍ර. කරන ලද සේවා වෙනුවෙන් රාජරාජමහාමත්‍යාදීන් විසින් තෑගි කරනු ලබන භූමි භාගය; ගම්ලද්දන් ලැබූ භූමි ප්‍රදේශය.
3. නා.ප්‍ර. උතුම් ගම; සරුසාර ග්‍රාමය.