අක්ෂර වින්‍යාස ශබ්දකෝෂය – 212
පාලනය
නා. රැකීම; ආණ්ඩු කිරීම (පා. සං. පාලන)
පාලම
නා. දෙගොඩක් සම්බන්ධ කරන මාර්ගය; සේතුව; හෙය (දෙ. பாலம் සං. පාලි)
පාලි
නා.ප්‍ර. බුද්ධ ධර්මය/ මාගධී භාෂාව/ පෙළ බසින් ලියූ දහම් කොටස/ පේළිය/ පාලම; සේතුව (පා. පාලි, පාළි)
පාශය
නා. උගුල; තොණ්ඩුව/ කාම, රාග ආදි ක්ලේශ බැම්ම (සං. පාශ)
පාෂණ්ඩයා
නා. මිථ්‍යාදෘෂ්ටිකයා (සං. පාෂණ්ඩක)
පාෂාණ
නා.ප්‍ර. ගල (සං. පාෂාණ)
පාෂාණිභූත
වි. ගල් බවට පත් වූ; ගලක් වැනි වූ
පාසල
නා. පාඨශාලාව
පාසාණම්
නා.ප්‍ර. උග්‍ර විෂ වර්ගයක්; සුදු ආසනික්
පාළු
වි. හිස්; ජනශූන්‍ය (දෙ. பாழ்)
පැකිලෙනවා
ක්‍රි. හැපෙනවා; පටලැවෙනවා/ ප්‍රමාද වෙනවා; පසුබට වෙනවා (පා. පක්ඛලති)
පැටලිලි
නා.ප්‍ර. අවුල; කරදරය
පැණ
නා. නයි පෙණය (පා. සං. ඵණ)
පැණි
1. නා.ප්‍ර. මිහිරි, රසවත් වූ දෙය (පා. ඵාණී) 2. ප්‍රාණියා (සං. ප්‍රාණි පා. පාණි)
පැණිමුළ
නා. පැණි පුරවන ලද පැස; පැණි පට්ටය
පැතලි
වි. තුනී; සමතල
පැදකුණු
නා.ප්‍ර. ගෞරව කිරීම සඳහා දකුණතට එම වස්තුව වටා යෑම/ වටා යෑම; සැරිසැරීම (පා. පදක්‍ඛිණා සං. ප්‍රදක්‍ෂිණා)
පැන
1. නා.ප්‍ර. ප්‍රශ්නය; ගැටලුව (පා. පඤ්හ සං. ප්‍රශ්න) 2. පානීය ජලය (පා. සං. පාන, පානීය) 3. අත්හැර දැමූ දෙය (පා. පහීන) 4. ප්‍රඥාව; නුවණ (පා. පඤ්ඤා සං. ප්‍රඥා) 5. මලපුඩුව (පා. පණ්ණ)
පැන නඟිනවා
ක්‍රි. මතු වෙනවා; හට ගන්නවා
පැනසර
වි. ගැඹුරු නුවණින් යුත් (සං. ප්‍රඥාසාර)
පැන්
නා.ප්‍ර. ජලය; බොන දෙය (පා. සං. පාන, පානීය)
පැන් කෙණ්ඩිය
නා. දිය කොතලය
පැන්තාලිය
නා. මගීන්ගේ ප්‍රයෝජනය සඳහා මග අයිනේ තබා ඇති පැන් පිරවූ බඳුන; පැන් කළය
පැන්නුම
නා. වැවක වැඩි ජලය බැස යන කපොල්ල/ යම් සම්බන්ධතාවක් වෙන් කිරීම/ පලවා හැරීම