සංක්ෂිප්ත සිංහල ශබ්දකෝෂය – 1086
පින
1. නා. යහපත ; කුසලය ; පුණ්‍යය.
2. යහපත හා සම්බන්ධ කාර්යය.
3. යහපත් ක්‍රියා කිරීමෙන් හට ගැනී, පවතින ආත්මභාවයේ දී නොහොත් (විශේෂයෙන්) අනාගත ආත්මභවයේ දී යහපත් ප්‍රතිඵල ගෙන දිය හැකි චෛතසික බලවේගය.
පිනනවා
ක්‍රි. සතුටු වෙනවා ; ප්‍රීති වෙනවා ; ප්‍රිය කරනවා.
පින් අනුමෝදනාව
නා. කළ පින් අනුව සතුටු වීම.
පින් කිරිය
නා. පුණ්‍යක්‍රියාව.
පින් දෙනවා
ක්‍රි. පින් අනුමෝදන් කරනවා ; ප්‍රාප්තිදානය කරනවා ; යමකු විසින් ඉටු කරන ලද පින්කමකින් හට ගැනෙන පින අනුන් වෙත ද පවරනවා.
පින් පඩිය
නා. සේවාවන් නොගෙන ජීවත්වීම සඳහා කෙනකුට ගෙවන වැටුප.
පින් පත්‍රය
නා. සම්මාදම් පත්‍රය.
පින්තාරුකරුවා
නා. චිත්‍ර අඳින්නා ; සායම් කරන්නා.
පින්තූරය
නා. ඡායාරූපය ; සිතුවම ; රූපය ; චිත්‍රය.
පින්තොට
නා. ආධ්‍යාත්මික පාරිශුද්ධිය සඳහා ජලස්නානය කරන ගංතොට ; පුණ්‍ය තීර්ථය.
පින්පෙත්
නා.ප්‍ර. මළගිය අයට එලොව යහපත පතා දෙනු ලබන පින්.
පින්බර
වි. පුණ්‍ය ලක්ෂණයෙන් හෙබි ; අතිශයින් පින්වත්.
පින්සලය
නා. චිත්‍ර ඇඳීමේ දී හෝ පින්තාරු කිරීමෙ දී සායම් තැවරීම සඳහා ගන්නා කෙඳි සහිත උපකරණය ; බුරුසුව ; තෙලිකූර.
පිනි
1. නා.ප්‍ර. රැයෙහි තණකොළ ආදියෙහි වැටෙන සිහින් සිසිල් දිය බින්දු; තුෂාර
2. මිදුණු ජලය ; හිම.
3. මත්ස්‍යයා.
4. මහනෙල් මල.
පිනි බානවා
ක්‍රි. පිනි වැටෙනවා.
පිනිඅංකය
(පාරිභා.) නා. (භූගෝ.) වාතයේ පවතින වාෂ්ප සිසිල් වී ඝනවීමෙන් පිනි බවට හැරෙන උෂ්ණත්වය දක්වන අංකය.
පිනිදිය
1. නා.ප්‍ර. පිනි නමැති ජලය ; පින්නෙන් ඇති වන ජලය ; තුෂාර.
2. සුවඳ දියර වර්ගයක්.
3. බෙලි හෝ දිවුල් මල් තැම්බීමෙන් පෙරා ගත් ස්‍රාවණය.
4. මල්පැණි.
පිනිපා
1. නා. සඳ ; චන්ද්‍රයා ; උලිඳු.
2. ඇතා ; හස්තියා.
3. හාවා.
4. මත්ස්‍යයා.
පිනුම
නා. පා බිම නොතබා සිටින තැන සිට තවත් තැනකට මාරුවීම.
පිපටය
නා. ද්‍රව මනින උපකරණයක්; ද්‍රව මානයක් ; නාලිකාව.
පිපාසය
නා. දිය බීමට ඇති වුවමනාව ; පැන් පවස ; තිබහ.
පිපිරෙනවා
ක්‍රි. පැළෙනවා ; කැබලි කැඩී වෙන් වෙනවා; ගැහී යනවා.
පිපෙනවා
1. ක්‍රි. පිම්බී එනවා ; මහත් වෙනවා.
2. විකසිත වෙනවා ; පුබුදු වෙනවා.
පිබිදෙනවා
ක්‍රි. නින්දෙන් නැඟී සිටිනවා ; අවදි වෙනවා ; ප්‍රබුද්ධ වෙනවා.