සංක්ෂිප්ත සිංහල ශබ්දකෝෂය – 1084
පිටිය
1. නා. එළිමහන් සමතලා තැනි බිම ; පිට්ටනිය.
2. තණ බිම.
පිටියුටරි ග්‍රන්ථිය
(පාරිභා.) නා. පෘෂ්ඨවංශීන්ගේ මොළය පත්ලට වන්නට පිහිටා ඇතිව ශරීර වර්ධනය සඳහා හෝමෝන උපදවන ග්‍රන්ථියක් ; පිටියුටරිය.
පිටිවහල
නා. උදව්ව ; උපකාරය ; උපස්තම්භය ; පිහිට.
පිටිවහල් කරනවා
1. ක්‍රි. උදවුවෙනවා ; උපකාරවෙනවා.
2. පිට පෙදෙසකට නෙරපා හරිනවා ; රටින් පලවා හරිනවා.
පිටිසර
නා.ප්‍ර. නගරයකින් දුර බැහැර ප්‍රදේශය ; ගම්බද පෙදෙස ; පසල් දෙස.
පිටු දකිනවා
ක්‍රි. පන්නනවා ; පලවා හරිනවා ; නෙරපනවා.
පිටු දෙනවා
1. ක්‍රි. උදවු වෙනවා ; පිහිට වෙනවා ; උපකාරි වෙනවා ; පිටුබල සපයනවා.
2. මුහුණ දීමට ඉදිරිපත් නොවී මඟ හරිනවා ; බියෙන් පලා යනවා ; සැඟවෙනවා.
පිටුබල
නා.ප්‍ර. උපකාරය ; අත් උදව්ව ; පිටුවහල.
පිඨරය
1. නා. මුට්ටිය ; මහ හැළිය.
2. හැඳිගෑම හෝ කැලඹීම සඳහා භාවිත කරන පැතලි ලීය ; මතය ; මන්ථය.
පිඩ
1. නා.ප්‍ර. ගුළි කරනු ලැබූ දෙය.
2. ආහාර පිඩ ; වරකට මුව තුළට ගනු ලබන ආහාර ප්‍රමාණය.
3. අතට ගත හැකි තරමේ සුළු ප්‍රමාණයක්.
පිඩැල්ල
නා. උදලු පහරකට වරකට කැපෙන පස් කුට්ටිය.
පිඩු කරනවා
1. ක්‍රි. ගුළි බවට පත් කරනවා ; කැටි කරනවා.
2. සම්පිණ්ඩනය කරනවා ; සාරාංශ කරනවා.
පිඩු සිඟනවා
ක්‍රි. (පැවිදි උතුමකු) ආහාර සඳහා ගෙපිළිවෙළින් යනවා · පිණ්ඩපාතයේ වඩිනවා.
පිණනවා
ක්‍රි. සතුටු වෙනවා ; සන්තෝෂ වෙනවා ; ප්‍රමුදිත ඇති වෙනවා.
පිණ්ඩපාතිකාංගය
නා. පිඬු සිගීමෙන් ලැබෙන ආහාරය පමණක් අනුභව කිරීමෙන් රකින ව්‍රත සමාදානය.
පිණ්ඩය
1. නා. ගුළි කරනු ලැබූ දෙය ; පිඬු කළ දෙය ; කැටිය ; පිඬ ; වරකට මුව තුළට ගන්නා ආහාර ටික
2. සාරය ; සාරාංශය.
3. මූර්තය ; ආකෘතිය.
4. සංඛ්‍යා එකතු කිරීම වැනි ගණන් ක්‍රමයකින් ලබාගන්නා ඵලය හෙවත් උත්තරය.
5. මියගියවුන් පිණිස දෙන ආහාර දානය.
6. යකඩ.
7. ශක්තිය ; බලය.
8. සුගන්ධ ද්‍රව්‍යය ; සුවඳ ලාටු.
9. කලල රූපය.
10. කප්පිය ; ගුටකය ; බොලොක්කය.
11. නෙරීම ; ඉදිමුම.
පිණ්ඩාකාරය
පිණ්ඩාර්ථය
[පිණ්ඩ + අර්ථය]
නා. පිඬු කළ අදහස ; කැටි කළ අරුත ; සංක්ෂිප්තාර්ථය.
පිණ්ඩිකාව
1. නා. උඩු පතුල.
2. රියසක ; සක්නැබ ; බොස්ගෙඩිය.
3. පෙණහැල්ල, අක්මාව යන අවයවවල පවතින ගෝලාකාර ද්‍රව්‍ය විශේෂය.
පිණ්ඩිය
1. නා. කැටය ; කැටිය ; වැදැල්ල ; ගුළිය ; පිඬ.
2. පොකුර ; වල්ල.
පිණ්ඩිලයා
නා. දෛවඥයා ; නක්ෂත්‍ර විද්‍යාඥයා ; නැකැත්කරුවා.
පිණ්‍යාක
1. නා.ප්‍ර. තල ඇට ආදියේ තෙල් මිරිකා ගැනීමෙන් පසු ඉතිරි වන රොඩ්ඩ ; තල පුන්නක්කු.
2. සුගන්ධ ද්‍රව්‍ය.
3. තල කැරලි
පිණි
1. වි. පිණාගිය ; සංතෘප්ත.
2. ඉතා මිහිරි ; ප්‍රණීත.