සංක්ෂිප්ත සිංහල ශබ්දකෝෂය – 219
ආධාරය
1. නා. යමක් උසුලා හෝ දරා සිටින දෙය.
2. නා. උපකාරය; සහාය; අනුග්‍රහය; පිහිට.
3. නා. යමක් වෙනුවෙන් කරන මූල්‍ය හෝ වෙනත් පරිත්‍යාගය.
4. (ව්‍යාක.) නා. ආධාර විභක්තිය.
ආධික්‍යය
නා. බහුලත්වය; අධිකකම.
ආධිපත්‍ය දණ්ඩය
නා. අධිපති බවේ සංකේතය වශයෙන් භාවිත කරන යෂ්ටිය; සෙංකෝලය.
ආධිපත්‍යය
නා. අධිපති බව; ස්වාමිත්වය; ප්‍රභූත්වය; බලය.
ආධුත
වි. සොලවන ලද; චාලිත.
ආධුනික
වි. අලුත්; නවක; පුහුණු වන; ආරම්භක.
ආධුනිකයා
නා. ආරම්භ කරන්නා; නවකයා; ඉගෙන ගන්නා.
ආන
1. නා.ප්‍ර. හුස්ම ඉහළට ගැනීම; ආශ්වාසය.
2. නා.ප්‍ර. නිජ භූමිය; උත්පත්ති ස්ථානය.
3. නා.ප්‍ර. වනය.
4. නා.ප්‍ර. පැදුරු, මලු ආදිය එල්ලා තබන ආධාරකය.
ආනක
නා.ප්‍ර. විශාල යුද බෙර විශේෂයක්.
ආනත
වි. නැමුණු; නැඹුරු වූ; ඇල වූ; බෑවුම් සහිත වූ.
ආනත තලය
(පාරිභා.) නා. බෑවුම් තලය; පසෙකට ඇල වූ සමතලය (=inclined plane).
ආනත දර්පණය
(පාරිභා.) නා. ඇල වූ කැඩපත (=inclined mirror).
ආනතිමානය
(පාරිභා.) නා. බෑවුම් මැනීමේ උපකරණය (=clinometer).
ආනතිය
(පාරිභා.) නා. ඇලවීම; බෑවුම; ප්‍රවණතාව; නැඹුරුතාව (=inclination).
ආනනය
1. නා. මුඛය.
2. නා. මුහුණ; වක්ත්‍රය.
3. නා. කටකලියාව; මුව රජ්ජුව.
ආනනවා
1. ක්‍රි. ඈනුම් අරිනවා.
2. ක්‍රි. හති දමනවා; අමාරුවෙන් ආශ්වාස ප්‍රශ්වාස කරනවා.
ආනන්තර්යය
නා. අනන්තර භාවය; ඉක්බිතිව ම සිදු වන බව.
ආනන්තරික
වි. අනතුරු හෙවත් ඊළඟ ආත්මභවයෙහි විපාක දෙන.
ආනන්ත්‍ය
වි. සීමාරහිත; අසීමිත; අන්ත රහිත.
ආනන්ද
නා.ප්‍ර. සතුට; සන්තෝෂය; ප්‍රීතිය; ප්‍රමෝදය; ආහ්ලාදය.
ආනන්දිත
වි. ආනන්දයට පත්; ප්‍රීති වූ; සතුටට පත්.
ආනබාල්කය
(කථා.) නා. කුරුපාව.
ආනමනය
නා. නැමීම; ඇලවීම.
ආනමානය
1. නා. උපාය; උපක්‍රමය; ප්‍රයෝගය.
2. නා. විදීමේ, වෙඩි තැබීමේ ඉලක්කය හෙවත් කුරුමානම.