සංක්ෂිප්ත සිංහල ශබ්දකෝෂය – 784
දක
නා.ප්‍ර. දිය; ජලය; උදකය.
දක සෝතය
නා. ස්ත්‍රී නිමිත්ත.
දකපතිය
නා. ගොවියන් ලබා ගත් දියවර සඳහා වැව් හිමියාට පුරාණයේ දී ගෙවූ බද්ද.
දක්කනවා
1. ක්‍රි. දකින්නට සලස්වනවා; පෙන්නුම් කරනවා; ඉදිරිපත් කරනවා; ප්‍රදර්ශනය කරනවා.
2. ක්‍රි. ගවාදි සතුන් හෝ අදින රිය හෝ ගමන් කරවනවා; සතුන්ගේ හෝ රියවල ගමන මෙහෙයවනවා; ඉදිරියට යවනවා.
3. ක්‍රි. තමන්ට රිසි පරිදි අනිකකු ලවා ක්‍රියා කරවනවා; අනිකකුගේ ක්‍රියාමාර්ගය මෙහෙයවනවා.
දක්ඛිණ
වි. දකුණු; උතුරට ප්‍රතිමුඛ.
දක්ඛිණාව
නා. දක්ෂිණාව.
දක්ඛිණාවත්ත
නා. දක්ෂිණාවර්ත.
දක්ඛිණෙය්‍ය
වි. දක්ෂිණාව ලැබීමට සුදුසු; චීවරාදි සිවුපසය ලැබීමට සුදුසු.
දක්න පේනුව
නා. මෝටර් එන්ජිමේ කාබියුරේටරයේ කොටසක්; ඉන්ධන තෙල් මට්ටම බලාගැනීමේ සිදුරේ ඇබය.
දක්නපතය
නා. අණු දක්නයේ කාචයෙන් පිරික්සා බැලෙන වස්තුව තැන්පත් කොට තබා ගැනීම සඳහා කාචයට යටින් සවි කොට ඇති තළිය.
දක්නාසුල්ලා
[දක්නා + සුලු + ආ]
නා. දැකීමේ ශක්තිය ඇත්තා; දක්නා ස්වභාව ඇත්තා; දැකීමේ පුරුද්ද ඇත්තා.
දක්නාසුලු
වි. දැකීමේ ස්වභාව ඇති; දර්ශනශීලි.
දක්ෂ
වි. යම්කිසි කාර්යයක හපන්කම් ඇති; මහත් හැකියාවෙන් යුක්ත; සපන්; සමර්ථ; ශූර; නිපුණ.
දක්ෂපක්ෂ
වි. දක්ෂ; හැකියාවක් සහිත; හපන්; සමර්ථ.
දක්ෂිණ
වි. දකුණු.
දක්ෂිණ අක්ෂාංශය
නා. පෘථිවි කක්ෂයේ සමකයෙන් දකුණු කොටසේ පිහිටි අක්ෂාංශ; දක්ෂිණාක්ෂය.
දක්ෂිණ ධ්‍රැවය
නා. පෘථිවි කක්ෂයේ අක්ෂ දෙකෙන් දකුණෙහි පිහිටි අක්ෂය; පෘථිවියේ දකුණු කොන.
දක්ෂිණ බුද්ධාගම
නා. ලංකා, සියම්, බුරුම ආදි දකුණු ආසියානු රටවල පැතිර ඇති ථේරවාද බුද්ධ ධර්මය.
දක්ෂිණ සංඛය
නා. දකුණට කරකැවුණු හක්ගෙඩිය; දකුණු සක.
දක්ෂිණ සාගරය
1. නා. මහාමේරු පර්වතයට දකුණින් පිහිටා ඇතැයි සලකනු ලබන කල්පිත සාගරය.
2. නා. දක්ෂිණ ධ්‍රැවය වටා ඇති සාගරය; ඇන්ටාක්ටිකාව හාත්පස පිහිටි සාගරය.
දක්ෂිණාක්ෂ
නා.බහු. පෘථිවියේ නිරක්ෂයට දකුණින් පිහිටි අර්ධ ගෝලයේ නිරක්ෂය හා සමාන්තරව විහිදෙන අක්ෂාංශ වෘත්ත.
දක්ෂිණායනය
නා. සූර්යයා නිරක්ෂ රේඛාවෙන් දකුණට බර ව යන කල්පිත ගමන; ඒ ගමන් වීථිය; එසේ ගමන් කරන කාලසීමාව.
දක්ෂිණාර්ධ ගෝලය
[දක්ෂිණ + අර්ධ ගෝලය]
නා. පෘථිවි ගෝලයේ නිරක්ෂ රේඛාවට දකුණින් පිහිටි අර්ධය.
දක්ෂිණාර්හ
වි. දානය පිළිගැනීමට සුදුසු.